Efiopiýanyň paýtagty Addis-Abebadan 45 kilometr günorta-gündogarda ýerleşýän Bişoftu şäherinde Bişoftu halkara howa menziliniň (BIA) gurluşygyna girişildi. Reuters agentliginiň habar bermegine görä, bu howa menzili Afrika yklymyndaky iň uly awiasiýa merkezine öwrüler.
Taslamanyň bahasy 12-12,5 milliard dollar aralygynda bolup, ol häzirki hereket edýän Bole howa menziliniň işini ýeňletmegi hem-de ýurdy Afrika, Ýewropa we Aziýa yklymlaryny birleşdirýän esasy merkeze öwürmegi maksat edinýär.
"Ethiopian Airlines" kompaniýasynyň başlangyjy bilen amala aşyrylýan bu taslamanyň resminamalaryna görä, birinji tapgyrda desganyň ýolagçy geçirijilik ukyby ýylda 60 million adama deň bolar. Geljekde bolsa bu görkezijiniň 110 million ýolagça çenli ýetirilmegine garaşylýar.
Binagärlik dizaýny "Dar Group" we "Zaha Hadid Architects" tarapyndan taýýarlanyldy. Binagärler taslamanyň dizaýnyna Efiopiýanyň dört sebitiniň nyşanlaryny we Beýik Rift jülgesiniň keşbini siňdirdiler.
Toplumyň düzüminde dört sany uçuş-gonuş zolagy we 270 uçar üçin niýetlenen duralga (perron) meýilleşdirilýär. Paýtagt bilen howa menziliniň arasyndaky gatnawy ýokary tizlikli awtomobil ýoly we demir ýol üpjün eder. Häzirki wagtda taýýarlyk işleri üçin eýýäm 600 million dollardan gowrak serişde sarp edildi.
Gurluşygyň işjeň tapgyryna 2026-njy ýylyň awgust aýynda girişilmegi meýilleşdirilýär.
