RationalFX kompaniýasynyň maglumatlaryna görä, 2025-nji ýylda global tehnologiýa pudagynda 244 851 işgär kemeldi. Çünki, Intel, Amazon we Microsoft ýaly uly kompaniýalar emeli aň tehnologiýalaryna uly möçberde maýa goýmagyny dowam etdirýär.
Işden çykarylan işgärleriň sany boýunça ABŞ birinji orunda durýar – 220 kompaniýadan 170 630 adam. Ikinji orny Hindistan (19 049), üçünji orny Ýaponiýa (11 608) eýeleýär.
Ýewropada, esasan, Irlandiýa (11 500), Ispaniýa (7 450), Şweýsariýa (5 165) we Şwesiýa (3 718) zyýan çekdi.
RationalFX-iň analitigi Alan Koen 2025-nji ýylyň tehnologiýa pudagynda zähmet bazary üçin iň agyr ýyllaryň biri bolandygyny belledi. «Işden çykarma dünýäde ýüzlerçe müň işgäre täsir etdi, kompaniýalar netijeliligi we girdejililigi ýokarlandyrmak maksady bilen iş proseslerini EA-nyň töwereginde gurup başlady» — diýip, ol belledi.
Bilermenleriň hasaplamalary boýunça, işden çykarma ýagdaýlarynyň 69 840-ysy gönüden-göni EA-nyň ornaşdyrylmagy we awtomatizirleme bilen baglanyşyklydyr. Intel 33 900 işgäri, Amazon 19 555 işgäri (şol sanda 14 000-üsi EA sebäpli), Microsoft 20 009 işgäri işden çykardy. Umuman alanyňda, üç kompaniýa 72 700-den gowrak adamy işden çykardy.
Koeniň pikiriçe, işden çykarmalar 2026-njy ýylda birden togtamaz we azyndan birinji çärýegiň ahyryna çenli dowam eder.
