Ilon Maskyň xAI kompaniýasy tarapyndan işlenip düzülen Grok çat-boty ýanwar aýynyň ahyryna çenli Pentagonyň kompýuter ulgamyna birikdiriler we edaranyň gulluk maglumatlaryndan başlap, aňtaw materiallaryna çenli ähli maglumatlaryna elýeterli bolar. Bu barada ABŞ-nyň goranmak ministri Pit Hegset aýtdy diýip, Associated Press habar berýär.
Amerikan harby gullukçylary Maskyň EA kömekçisini eýýäm kompýuter ulgamyna goşulan Google-yň Gemini çat-boty bilen bilelikde ulanar.
«Tiz wagtdan dünýäde iň gowy emeli aň modelleri biziň edaramyzyň ähli gizlin däl we gizlin ulgamlaryna birikdiriler» — diýip, Hegset Tehasdaky SpaceX kompaniýasynyň ofisinde eden çykyşynda aýtdy.
Şeýle-de, Pentagonyň ýolbaşçysy emeli aň ulgamlarynyň «harby güýjüň kanuny ulanylmagyny çäklendirýän ideologik çäklendirmeler bolmazdan» işlejekdigini aýtdy.
Onuň aýtmagyna görä, EA-nyň netijeliligi gönüden-göni maglumatlaryň hiline bagly we Pentagon bu ulgamy ähli zerur maglumatlar bilen üpjün eder.
Hegset bu ädimleriň ýaragly güýçleriň maglumatlaryny mümkin boldugyndan ösýän tehnologiýalara birikdirmek boýunça has uly başlangyjyň bir bölegidigini sözüniň üstüne goşdy.
