«The New York Times» amerikan gazeti 2026-njy ýylda baryp görmeli 52 ýeriň sanawyny hödürledi.
Neşir birinji orunda «Rewolýusion Amerikany» ýerleşdirdi. Redaksiýa ýurduň 250 ýyllygy mynasybetli geçiriljek ýörişleri we sergileri görmek, futbol boýunça dünýä çempionatynyň oýnuna we 4-nji iýulda Waşingtondaky konserte gatnaşmak üçin ABŞ-a gitmegi maslahat berýär.
Ikinji setiri Warşawa eýeledi. Polşanyň paýtagty täze Häzirkizaman sungat muzeýi we TR Warszawa awangard teatry bilen tapawutlandy.
Üçünji orunda Bangkok ýerleşdi. Ol ýerde ýaşyl zolaklar az, ýöne Dib Bangkok häzirkizaman sungat merkezi we ýakynda gaýtadan dikeldilen «Wat Çaýwatthanaram» budda ybadathana toplumy bar. Ol 12 ýyl dikeldiş işlerinden soň ýene-de myhmanlar üçin açyk.
Şeýle-de, sanawa Kosta-Rikadaky Osa ýarymadasy, Hindistandaky Bandhawgarh gaplaň goraghanasy, geljekki futbol dünýä çempionatynyň merkezleriniň biri bolan Dallas şäheri, Alžirdäki Oran port şäheri hem-de eýýäm 100 ýyl bäri Çikago bilen Kaliforniýanyň Santa-Monika şäherini birleşdirýän meşhur şosse 66 (U.S. Route 66) bar.
«Arizonadaky Outmanyň golaýynda Gara daglaryň çöl bilen birleşýän ýerindäki 191 öwrümli Sidewinder ýolunda aýlanyp görüň. Autsaýderleriň sungat eserlerine, mysal üçin, Oklahoma ştatynyň Katusa şäherindäki «Gök läňehe» serediň. Onuň täze merkezi aprelde myhmanlar üçin öz gapysyny açar. Nýu-Ýork ştatynyň Gellap şäherindäki täzelenen El Rancho otelinde saklanyň. Bu ýerde Ketrin Hepbern we Gregori Pek hem bolupdy» — diýip, NYT belleýär.
Syýahat etmek üçin ýerleriň arasynda Saba Karib adasy, Barselonadaky Poblenou sebiti, Nepalyň daglary, Baýroýt opera festiwaly, Kanadanyň Gaýaly daglarynyň üsti bilen otluly gezelenç, Awstraliýanyň Top-End sebiti we Malaýziýadaky Penang şäheri bar.
Sanawa Nagasaki (Ýaponiýa), italýan Alplaryndaky Breý-Çerwiniýa dag zolagy, Çilidäki Frouard burny, Seýşel adalary, Norwegiýadaky Trena adalary, Awstraliýadaky Melburn, Ermenistan, Islandiýa we Wýetnam hem girdi.
