«Habbl» (Hubble) kosmos teleskopy örän geň galdyryjy astronomik obýekti — içinde ýekeje ýyldyz hem bolmadyk, diňe gazdan we garaňky maddadan ybarat bolan ägirt uly buludy ýüze çykardy. Phys.org neşiriniň habar bermegine görä, bu açyş galaktikalaryň nähili emele gelýändigi baradaky ylmy garaýyşlary üýtgedip biler.
«Bulut 9» (Cloud 9) diýlip atlandyrylan bu gurluş, aslynda "baş tutmadyk" galaktikadyr. Ol ýyldyzlary emele getirmek üçin ýeterlik madda toplap bilmedik, emma öz ykjamlygyny saklaýan madda üýşmegidir.
Obýekt ilkinji gezek mundan üç ýyl ozal Hytaýyň ägirt uly FAST radioteleskopy tarapyndan tapyldy.
Ýakynda «Habbl» teleskopy bu buludyň içinde hakykatdan hem hiç hili ýyldyzyň ýokdugyny gutarnykly subut etdi.
Sanlar we häsiýetnamalar:
- Ölçegi: Ýadrosynyň diametri takmynan 4900 ýagtylyk ýylyna deň.
- Mazmuny: Esasan neýtral wodorod gazyndan ybarat.
- Massasy: Gazyň massasy Günüňkiden 1 million esse uly.
- Garaňky madda: Iň geň galdyryjy tarapy — obýektiň düzümindäki garaňky maddanyň massasy Günüň massasyndan 5 milliard esse uludyr.
Astronomlaryň pikiriçe, bu anomaliýa häzirki wagtda durnukly ýagdaýda dur. Emma geljekde ol ýa beýleki kosmos maddalaryny özüne çekip, hakyky galaktika öwrüler, ýa-da wagtyň geçmegi bilen daralyp, kosmosda ýitip gider. Bu açyş Älemiň uly göwrümli gurluşlarynyň emele geliş mehanizmlerini öwrenmekde täze gapylary açýar.
