Microsoft korporasiýasy Edge brauzeri üçin giň gerimli dizaýn täzelenmesini synagdan geçirip başlady. Bu täze keşp emeli aň kömekçisi bolan Copilot-yň wizual stilinde taýýarlanyp, ulanyjylara has "akylly" we döwrebap interfeýsi hödürleýär.
Menýu bölümleri, sazlamalar we täze goşmaça sahypalar indi has aýlaw burçly dizaýna, ýöriteleşdirilen reňk palitrasyna we täze şriftlere eýe.
Täze dizaýn brauzeriň düýp gurluşyna ornaşdyryldy. Bu bolsa Copilot funksiýasy öçük bolsa-da, brauzeriň şol akylly keşpde galjakdygyny aňladýar.
Täze dizaýnyň 2024-nji ýylda Microsoft-a goşulan Inflection AI toparynyň döreden Pi kömekçisiniň interfeýsine örän meňzeşdigi bellenilýär.
Microsoft AI bölüminiň ýolbaşçysy Mustafa Süleýman täze brauzer strategiýasy barada şeýle diýdi:
"Täze brauzer bolmaz, diňe başga bir ulanylyş görnüşi bolar".
Bu bolsa Microsoft-yň täze bir brauzer döretmek däl-de, bar bolan Edge brauzerini doly emeli aň gurşawyna öwürmek isleýändigini görkezýär.
Häzirki wagtda bu täzelenme diňe Canary we Dev synag kanallarynyň ulanyjylary üçin elýeterli. Ýakyn geljekde bu wizual diliň beýleki Microsoft hyzmatlaryna we Windows operasiýa ulgamyna hem ornaşdyrylmagyna garaşylýar.
