Nvidia tehnologiýalaryna esaslanýan we 4-nji derejeli awtonom dolandyryş ulgamy bilen enjamlaşdyrylan robotaksiler geljek ýyl ýollara çykar. CNBC neşiriniň habar bermegine görä, SAE klassifikasiýasy boýunça 4-nji derejeli awtopilot köp ýagdaýlarda adamyň gatnaşmagyny talap etmeýär.
Las-Wegasda geçirilen CES 2026 sergisinde Nvidia-nyň esaslandyryjysy Jensen Huang kompaniýanyň geljekki meýilnamalaryny tanyşdyrdy. Onuň sözlerine görä, ulag tehnologiýalary emeli aňdan soňra kompaniýanyň iň möhüm ikinji iş ugruna öwrüler.
Häzirki wagtda Nvidia-nyň çözgütleri "2++" derejeli awtonomlyga degişli bolup, olar geçen çärýekde kompaniýa 592 million dollar (umumy girdejiniň 1%-i) peýda getirdi.
Şu ýylyň ahyryna çenli San-Fransisko ýaly iri şäherlerde Nvidia-nyň tehnologiýasynda işleýän Mercedes-Benz awtoulaglary özbaşdak hereket edip başlar.
Jensen Huang geljekde dünýä ýollarynda awtonom ulaglaryň sanynyň 1 milliarda ýetjekdigini çaklaýar.
Täze robotaksileriň işlenip düzülmegi DRIVE Hyperion ekoulgamynyň çäginde alnyp barylýar. Bu platforma aşakdakylary öz içine alýar:
- Çipler: Blackwell arhitekturasyna esaslanýan iki sany Drive AGX Thor çipi.
- Hyzmatdaşlar: Bosch, Magna, ZF Group ýaly ägirtler, şeýle-de Sony we Hesai ýaly datçik öndürijileri.
Nvidia sergide açyk çeşmeli (open-source) Alpamayo AI modelini hem tanyşdyrdy. Mercedes-Benz bu modeli eýýäm şu ýyl ABŞ-da we Ýewropada satyljak CLA modellerinde ösen 2-nji derejeli awtomatlaşdyrmany üpjün etmek üçin ulanar.
