Hytaýyň kosmonawtlar topary geljekde Aýa amala aşyryljak adamly uçuşlara taýýarlyk görmek maksady bilen, gowaklarda bir aýlyk ýörite okuw-türgenleşik geçdiler. Space News neşiriniň habar bermegine görä, bu maksatnama adamyň ekstremal şertler bilen özara gatnaşygyny öwrenmäge we Aýyň üstüni ýatladýan gurşawda hereket etmegi öwrenmäge gönükdirilendir.
Türgenleşik Hytaýyň günorta-günbataryndaky Çunsin şäheriniň daglyk sebitlerinde geçirildi. 28 hünärmen dört toparça bölünip, alty gün we bäş gijäni sowuk hem-de çygly ýerasty gowaklarda geçirdiler. Esasy maksat - daşky gurşawa gözegçilik, ýerasty kartalary düzmek we "kosmos-ýer" aragatnaşygyny simulýasiýa etmek.
Gowakdaky tapgyrdan başga-da, maksatnama jeňňellik şertlerinde iki günlük "diri galmak" okuwyny hem öz içine aldy. Gözegçi mugallymlar duýdansyz ewakuasiýalar we psihologik synaglar arkaly toparyň agzybirligini hem-de sazlaşykly işini barladylar. Şeýle formatdaky taýýarlyk Hytaýyň kosmos maksatnamasynyň taryhynda ilkinji gezek amala aşyryldy.
"Bu synaglardan alnan maglumatlar, kosmos stansiýasyndaky uzak möhletli missiýalara we Aýa uçjak kosmonawtlara psihologik goldaw bermek ulgamlaryny döretmekde möhüm ähmiýete eýe bolar" — diýip, Hytaýyň Kosmonawtlary barlamak we taýýarlamak merkeziniň hünärmeni Szýan Ýuan belledi.
