Huawei kompaniýasy sport dünýäsiniň rowaýaty şahsyýeti, marafonçy Eliud Kipçoge we professional Dsm-firmenich topary bilen hyzmatdaşlyga başlandygyny yglan etdi. Bu hyzmatdaşlygyň esasy maksady — ylgawçylar üçin niýetlenen täze we ýöriteleşdirilen Running Watch seriýasyny hödürlemekdir.
Bu ädim Huawei-niň Garmin, Suunto we Polar ýaly brendleriň agalyk edýän professional sport enjamlary bazaryndaky ornuny pugtalandyrmaga gönükdirilendir. Täze model 2021-nji ýyldaky Watch GT Runner modelinden soň dörän boşlugy doldurar.
Marafon dünýäsinde Eliud Kipçoge edil futbolçy Messi ýa-da boksçy Muhammad Ali ýaly uly abraýa eýedir. Ol iki gezek Olimpiýa çempiony, marafony (42,195 km) 2 sagatdan az wagtda ylgap geçen taryhdaky ilkinji ynsandyr.
Şeýle hem, 5 km we 10 km aralyklarda dünýä rekordçysy Joşua Çeptegeý hem täze sagady synagdan geçirmäge we türgenleşik maglumatlaryny kämilleşdirmäge gatnaşar.
Huawei täze enjamda ölçegleriň iň ýokary takyklygyna üns berer. Esasy tehnologiýalar:
- TruSense: Saglyk görkezijilerine gözegçilik etmek üçin sensorlar ulgamy;
- Sunflower GPS: Kompaniýanyň hususy ýokary takyklykly ýerleşiş ulgamy;
- 97% Takyklyk: 100 sany hünärmen ylgawçynyň gatnaşmagynda geçirilen synaglara esaslanyp, sagat ýaryşyň netijelerini çaklap biler.
Kompaniýa çylşyrymly professional modeller bilen gündelik akylly sagatlaryň arasyndaky "altyn ortalygy" eýelemegi, ýagny professional maglumatlary has düşnükli formatda hödürlemegi maksat edinýär. Enjamyň çykaryljak senesi we bahasy ýakyn wagtda mälim ediler.
