Samsung kompaniýasy CES 2026 sergisinde 2026-njy ýylyň OLED telewizorlarynyň hataryny hödürledi. Oňa täzelenen modeller S85H, S90H, S95H we düýbünden täze S99H girdi.
Flagman S99H metal karkasy bilen tapawutlanýar. Ol 55, 65, 77 we 83 dýuým diagonallar, 4K çözgüdi we 165 Gs täzelenme ýygylygy bilen hödürlenýär. Kiçi wersiýalarda QD-OLED panelleri ulanyldy, 83 dýuýmlyk model bolsa LG Display-den Tandem W-OLED panelini aldy. S99H-iň ýagtylygy S95F bilen deňeşdirilende 35%-e çenli ýokarydyr. Telewizor ýylpylda garşy Glare Free 3.0 örtügi bilen üpjün edildi we One Connect simsiz bloguny goldaýar.
S95H modeli S95F-iň yzyny dowam etdiriji boldy. Ol hem deň ýokary ýagtylyga, diwara jebis berkitmek üçin konstruksiýa we simsiz One Connect-e eýe boldy. Onuň diagonaly 48-den 83 dýuýma çenli bolup, ölçegine baglylykda LG W-OLED we QD-OLED panelleri ulanylýar.
S90H ortaça segmente degişli bolup, 165 Gs ýygylygy we Glare Free 3.0-y goldaýar. Ol 42-den 83 dýuýma çenli diagonallar bilen elýeterlidir.
S85H modeli 100 ýa-da 120 Gs bilen LG W-OLED panelini ulanýar.
Modelleriň ählisi Tizen OS 10.0 operasion ulgamy bilen işleýär, HDR10+ Advanced, Dolby Atmos tehnologiýalaryny, täze Samsung Eclipsa audioformatyny goldaýar. Öndüriji ýedi ýyl täzelenmäni wada berýär. Telewizorlara EA-ly oýun tehnologiýalary hem girizildi: şekilleriň bölünmegini aradan aýyrmak üçin FreeSync Premium, wideokartlar bilen sinhronizirlemek üçin G-Sync we adaptiw täzelenme ýygylygy üçin VRR. Programma üpjünçiligi Matter Hub we SmartThings arkaly akylly öýi dolandyrmagy, Alexa ses dolandyryşyny, AirPlay 2 ýaýlymyny we Microsoft Copilot kömekçisini öz içine alýar.
