Prezident Donald Tramp ABŞ-nyň 66 halkara guramadan we edaradan çykmagy baradaky permana gol çekdi. Administrasiýanyň bellemegine görä, olar «indi ýurduň bähbitlerine laýyk gelmeýär». Bu barada Ak tamyň saýtynda habar berilýär.
Resminama görä, bu sanawdan 31 gurama BMG-niň edaralarydyr. Permanda olaryň işiniň «ABŞ-nyň milli bähbitlerine, howpsuzlygyna, ykdysady taýdan gülläp ösüşine ýa-da özygtyýarlygyna ters gelýändigi» bellenilýär. Ähli federal departamentlere we agentliklere görkezilen guramalary maliýeleşdirmegi bes etmek tabşyryldy.
«Bu amerikan salgyt töleýjileriniň ABŞ-nyň ileri tutulýan ugurlaryna zyýan ýetirip, global bähbitleri öňe sürýän ýa-da möhüm meseleleri netijesiz ýa-da oýlanyşyksyz çözýän guramalary maliýeleşdirmegine we gatnaşmagyna nokat goýar» — diýlip, Ak tamyň habarynda aýdylýar.
Guramalaryň doly sanawy administrasiýanyň resmi saýtynda ýerleşdirildi. Onda, hususan-da, Wenesiýa komissiýasy, BMG-niň Halkara hukuk komissiýasy, BMG-niň Halkara söwda merkezi, BMG-niň Baş sekretarynyň çagalara gatnaşykda zorluk meseleleri boýunça ýörite wekiliniň ofisi we beýlekiler bar.
Mundan öň Donald Tramp ikinji prezidentlik möhletinde ABŞ-nyň Bütindünýä saglygy goraýyş guramasyndan, BMG-niň Adam hukuklary geňeşinden, BMG-niň palestinaly bosgunlara kömek üçin Ýakyn Gündogar agentliginden, şeýle-de ÝUNESKO-dan çykmagy (çözgüt 2026-njy ýylyň dekabrynyň ahyrynda güýje girer) barada aýratyn permanlara gol çekdi.
