Kuhl Racing ýapon týuning-atelýesi Blocker Iron Build atly taslamany yglan etdi. Ony Tokio sergisinde görkezmek meýilleşdirilýär. Taslama üçin esas hökmünde Toyota Land Cruiser Prado alyndy.
Awtomobiliň ýerden beýikligi asgyçdaky (podweska) üýtgeşmeleriň we adaty bolmadyk tigirleriň hasabyna artdyryldy hem-de köp sanly metal gorag elementleri bilen üpjün edildi. Taslamanyň resmi premýerasy entek geçirilmedi, ýöne baha eýýäm belli: standart hereketlendirijili taýýar awtomobiliň bahasy 6 790 000 ýena (takmynan, 43,3 müň dollar) barabar.
Ulagyň asgyjy Jaos ýapon atelýesiniň komponentlerini ulanmak bilen gaýtadan işlendi. Şeýle-de, Land Cruiser Prado üýtgeşik dizaýnly 22 dýuýmlyk tigir diskleri we daşlardan, palçykdan, çägeden ýöremek üçin niýetlenen 37 dýuýmlyk Yokohama Geolandar M/T G003 tekerleri bilen üpjün edildi. Şeýle üýtgeşmeleriň netijesinde awtomobiliň ýerden beýikligi 400 millimetre ýetýär.
Mundan başga-da, kuzowyň goragyna aýratyn üns berildi. Awtomobiliň bamperlerinde, bosagalarynda we tigir arkalarynda berk metal elementler oturdyldy. Şeýle-de, awtoulagyň aşaky bölegi goraga eýe boldy we üçekde ekspedisiýa bagaž konstruksiýasy ýerleşdirildi. Ulagyň yzky bölegine birbada iki spoýler goşuldy.
