«Awatar: Ot we kül» filmi dünýä prokatynda 1 milliard dollar girdeji görkezijisinden geçdi diýip, Collider neşiri habar berýär. Film 2025-nji ýylyň 19-njy dekabrynda ekrana çykdy we bary-ýogy iki hepdeden sähel gowrak wagtyň içinde bu görkezijä ýetdi.
Bu üstünlik netijesinde franşizanyň döredijisi Jeýms Kemeron kino taryhynda birbada dört filmi prokatda 1 milliard dollardan gowrak peýda getiren ýeke-täk režissýor boldy. Mundan ozal «Titanik», birinji «Awatar» we «Awatar: Suwuň ýoly» filmleri bu sepgidi eýeläpdiler.
1997-nji ýylda çykan «Titanik» şu güne çenli dünýä prokatynda 2,2 milliard dollar gazandy. 2009-njy ýylda goýberilen «Awatar» filminiň birinji bölümi 2,9 milliard dollar girdeji getirip, häzirki wagta çenli kino taryhynda iň girdejili film bolmagynda galýar. Onuň dowamy bolan «Awatar: Suwuň ýoly» bolsa prokaty 2,3 milliard dollar netije bilen tamamlady.
Üçünji bölümiň üstünligi «Awatar» franşizasyna kino taryhynda iň girdejili trilogiýa bolmaga mümkinçilik berdi. Eýýäm 2025-nji ýylyň 29-njy dekabrynda üç filmiň jemi girdejisi 6 milliard dollardan geçdi. Şol senä çenli «Ot we kül» filmi 760 million dollardan gowrak gazanypdy.
«Awatar 3-üň» ýokary girdejileri Disney studiýasyna 2019-njy ýyldan bäri ilkinji gezek ýyllyk kassa ýygymynda 6 milliard dollar sepgidinden geçmäge kömek etdi. Studiýanyň 2025-nji ýyldaky iň girdejili filmleri 1,3 milliard dollar netije bilen «Haýwanlar şäheri 2» we 1 milliard dollar gazanan «Lilo we Stiç» boldy.
«Awatar 3-üň» sýujeti wulkanlaryň golaýynda ýaşaýan gazaply Na’wi taýpasyna bagyşlanýar. Filmde esasy gürrüň beriji hem üýtgeýär: indi wakany Jeýk Salli däl-de, onuň ogly Loak gürrüň berýär. Esasy rollary ýene-de Sem Wortington, Zoe Saldana, Keýt Winslet we Sigurni Wiwer janlandyrdylar.
