Halkara senagatçylar we telekeçiler uniwersiteti iňlis dili boýunça bäsleşik geçirdi. "Bitaraplyk — dillerimiziň senasy" diýlip atlandyrylan bäsleşik Aşgabat we Arkadag şäherleriniň orta mekdepleriniň 12-nji synp okuwçylarynyň arasynda geçirildi.
Bäsleşige 67 sany umumybilim berýän orta mekdepden, şeýle hem iňlis dili çuňlaşdyrylyp öwredilýän ýöriteleşdirilen okuw mekdeplerinden 200-e golaý okuwçy gatnaşdy.
Bäsleşigiň dowamynda gatnaşyjylar bu ders boýunça bilim derejelerini, iňlis dilini öwrenmäge bolan höweslerini we öz bilimlerini iş ýüzünde ulanmak ukyplaryny görkezdiler. Şeýle hem, mekdep okuwçylary döredijilikli wezipeleri ýerine ýetirmekde öz ukyplaryny görkezdiler.
Bäsleşigiň netijeleri boýunça ýeňijiler kesgitlenip, olara I, II we III orunlar berildi. Iň gowy netije görkezen gatnaşyjylara degişli derejeli diplomlar we ýadygärlik sowgatlary gowşuryldy.
Bu bäsleşik bilim ulgamyndaky döwlet maksatnamalaryny durmuşa geçirmegiň, milli ylym-bilim ulgamyny ösdürmegiň, geljekki hünärmenleri taýýarlamaga goldaw bermegiň, hemmetaraplaýyn ösen ýaşlary terbiýelemegiň, şeýle hem daşary ýurt dillerini okatmagy kämilleşdirmegiň we onuň hilini halkara standartlaryna laýyk getirmegiň çäklerinde gurnaldy.
