Birleşen Arap Emirlikleriniň Ras-el-Haýma şäherinde Täze ýyl gijesi Ginnesiň täze rekordy hasaba alyndy. Bu ýerde dronlaryň kömegi bilen howada mifiki jandaryň iň göwrümli şekili görkezildi.
2026-njy ýylyň gelmegi mynasybetli emirlikde 15 minutlyk dron we feýerwerk şüweleňi geçirildi. Onuň iň esasy wakasy bolsa gijeki asmanda peýda bolan feniksiň şekili boldy. Munuň üçin 2300 dron ulanyldy, olardan 1000-si pirotehniki dronlardy.
Şeýle-de, tomaşaçylara «Hoş geldiňiz» diýlip atlandyrylan we myhmansöýerligi alamatlandyran adamyň uly üç ölçegli sudury görkezildi.
Ýarygijä golaý dron şüweleňiniň ornuny feýerwerkler çalyşdy. Jemleýji waka Marjan adasyndan Al-Hamra sebitine çenli kenaryň ugry bilen uzan alty kilometrlik feýerwerk boldy.
Mundan başga-da, guramaçylar iň uly ýeke feýerwerk bilen Ginnesiň ýene bir rekordyny goýmak synanyşygy barada aýtdy. Olaryň maglumatlaryna görä, 1,68 metr diametrli we iki tonna töweregi agramly pirotehniki zarýad atylan ýagdaýynda ini bir kilometre çenli ýetýän asman bölegini gurşap almalydy.
WAM agentliginiň belläp geçişi ýaly, Ras-el-Haýma öňem Täze ýyl rekordlaryny goýupdy. 2024-nji ýylda bu ýerde suwda we asmanda iň uzyn feýerwerk liniýalary, 2022-nji ýylda bolsa dronlar bilen feýerwerkleriň beýikligi we bir wagtda feýerwerk atan dronlaryň sany boýunça rekordlar hasaba alyndy.
