Beýik Britaniýanyň ýaşaýjysy Kidus Tesera öz ýasan agaç welosipedinde tutuş ýurt boýunça syýahata ugrady. Onuň täsin syýahaty barada The Guardian gazeti habar berýär.
Asly Efiopiýaly bolan bu adam sekiz ýyl mundan ozal Londonyň Imperiýa kollejinde okamak üçin Angliýa gelýär we tiz wagtdan şol bir gündelik durmuşa başlandygyny we öz medeniýeti bilen aragatnaşygy ýitirýändigini duýýar.
Geçen ýyl ol Lidsde ýaşaýan daýysynyň ýanyna göçdi we ilkinji gezek welosipede mündi.
«Men haýyr-sahawat dükanyndan welosiped satyn aldym. Meniň dostlarym onuň 10 ýaşly çaga niýetlenendigini aýdyp, maňa ulular üçin welosipedi sowgat etdiler. Ol iki ýyl dostumyň baglygynda durdy, şonuň üçin erbet ýagdaýdady. Men ony abatlamak üçin bir aý sarp etdim» - diýip, Tesera gürrüň berdi.
Tiz wagtdan ol oýlap tapyjylar üçin ussahana bolan Hackspace atly taslama goşulýar. Bu ýerde, esasan, gaýtadan işlenilen materiallary ulanyp, agaç welosiped ýasaýar. Ol şeýle welosipedi hereketde barlap görmek üçin syýahata ugraýar.
Ol öz ýoluna kontinental Beýik Britaniýanyň iň demirgazyk nokady bolan Jon-o’Groutsdan başlaýar we günorta çenli tutuş ýurdy aýlanmagy meýilleşdirýär.
«Ilkinji üç gije elhenç boldy. Men ýatmak üçin çadyr hem satyn almandym: diňe ýapynmak üçin keten aldym. Nah matadan köýnege bil baglap, azajyk goş aldym. Ýel we ýagyş güýçlüdi» - diýip, ol aýdýar.
Agaç welosiped hemme ýerde ünsi çekdi we bir pursatda Tesera bilen wideo TikTok-a düşdi. Adamlar oňa otel üçin pul iberip başlady, käbirleri oňa ýatalga we nahar hödürledi. Welosiped birnäçe gezek döwüldi we oňa ýene-de ýerli adamlar kömege geldi: biri hatda onuň öňdäki tigirini öz gyzynyň çagalar üçin welosipediniň tigirine çalyşdy.
Käbir kömek edenler bilen Tesera gatnaşmagyny dowam etdirýär. «Floris» tupany wagtynda ony bir är-aýal öýüne myhman alyp, gyzgyn nahar we ýatmak üçin ýer hödürläpdi.
Syýahat Teserany haýyr-sahawat guramalary üçin serişde ýygnamaga ruhlandyrdy.
