Türkmenistanyň Döwlet energetika institutynyň talyp gyzlary Hytaý Halk Respublikasynyň Nankin şäherinde geçirilen Nazary mehanika boýunça VI halkara olimpiadasynda kümüş medallara mynasyp boldular. Türkmenistanyň Bilim ministrliginiň habar bermegine görä, ýaryşyň jemleri boýunça milli ýygyndy toparymyz hem toparlaýyn hasapda ikinji orny eýeledi.
Bu intellektual bäsleşik Hohaý uniwersitetiniň binýadynda guralyp, oňa dünýäniň 66 ýokary okuw mekdebinden 600-den gowrak wekil gatnaşdy.
Halkara bäsleşikde Türkmenistana Dursunjemal Ataýewa we Mähriban Azadowa wekilçilik etdiler. Gatnaşyjylaryň ikisi hem şahsy hasapda ýokary netijeleri görkezip, hormat münberiniň ikinji basgançagyna göterilmegi başardylar.
Baýrakçylaryň gazanan üstünlikleriniň hormatyna Türkmenistanyň Döwlet energetika institutynda dabaraly çäre geçirildi. Ýeňijilere hormat hatlary gowşuryldy. Dabara okuw mekdebiniň döredijilik toparlarynyň taýýarlan aýdym-sazly çykyşlary bilen utgaşdy.
