Günorta Uelsiň Ogmor-baý-Si kenarynda meýletinçiler geň tapyndyny — Wiktoriýa döwrüne (XIX asyryň ikinji ýarymy) degişli birnäçe ýüz ädigi tapdylar. BBC-niň habar bermegine görä, aýakgaplar «Beach Academy» guramasynyň agzalary tarapyndan derýanyň kenarynda arassalaýyş işleri geçirilýän wagtynda tapyldy.
Tapyndylaryň arasynda erkekleriň hem, aýallaryň hem aýakgaplary bar. Olaryň bir bölegi gowy ýagdaýda saklanyp galypdyr, bu bolsa hünärmenlere ädikleriň gurluşyny we olaryň önümçiliginde ulanylan materiallary jikme-jik öwrenmäge mümkinçilik berdi.
«Beach Academy» guramasynyň wekili Emma Lamportyň pikirine görä, bu aýakgaplar takmynan 150 ýyl mundan ozal Tasker-Rok gaýasynyň golaýynda heläkçilige uçran «Frolik» italýan gämisiniň ýüküniň bir bölegi bolup biler. Gäminiň ammaryndaky zatlar wagtyň geçmegi bilen deňiz tarapyndan ýuwulyp, kenara çykarylan bolmagy mümkin.
Taryhçylar bolsa başga bir çaklamany hem aradan aýyrmaýarlar. Olar aýakgaplaryň ýerli ädikçiler tarapyndan bejermäge ýaramsyz diýlip, derýa taşlanan bolmagynyň mümkindigini çaklaýarlar. Derýanyň akymy olary kenara çykarýança, olary köp ýyllaryň dowamynda bir ýerden başga ýere süýşüren bolmagy ähtimal.
Häzirki wagta çenli bu çaklamalaryň hiç biri hem doly tassyklanmady, emma barlagçylar jogap gözlemegini dowam etdirýärler.
