Abu-Dabide Birleşen Arap Emirlikleriniň esaslandyryjysyna we ilkinji Prezidentine bagyşlanan iri medeni merkez — Şeýh Zaýed adyndaky Milli muzeý açyldy. Saadiýat adasynda ýerleşýän bu muzeý ýurduň taryhy we onuň lideriniň mirasy bilen tanyşmak üçin döredilen özboluşly giňişlikdir.
Muzeýiň binasynyň taslamasy dünýä belli binagär Norman Foster tarapyndan taýýarlandy. Binanyň görnüşi çarwa däpleriniň we tebigata bolan sarpanyň nyşany bolan laçynyň ganatlaryndan ylham alnyp döredildi. Muzeýde 1500-e golaý taryhy gymmatlygyň (artefaktyň) görkezilýän alty sany hemişelik galereýasy bar. Ekspozisiýa bürünç asyrynyň ýelkenli gämisiniň rekonstruksiýasyndan başlap, 1971-nji ýylda esaslandyrylan häzirki zaman döwletiniň gazananlaryna çenli bolan 300 000 ýyllyk taryhy döwri öz içine alýar.
Muzeýiň bir bölegi wagtlaýyn sergiler üçin niýetlenendir. Binanyň golaýynda Şeýh Zaýediň 1918-nji ýyldan 2004-nji ýyla çenli dowam eden ömür ýoluny yzygiderli beýan edýän "Al Masar" bagy ýerleşýär. Muzeý esasan maşgala bolup gelýänler we bilim alýan ýaşlar üçin niýetlenen.
Täze muzeýiň açylmagy Saadiýat adasynyň medeni we dynç alyş merkezi hökmündäki derejesini has-da berkidýär. Bu ýerde eýýäm Luwr Abu-Dabi we Tebigat taryhy muzeýi hereket edýär, şeýle hem Guggenhaým muzeýiniň gurluşygy tamamlaýjy tapgyrda barýar.
