Warner Bros. we Disney kinostudiýalary «Alaň: Bölüm 3» we «Ar alyjylar: Kyýamat güni» filmlerini ABŞ-da prokata 2026-njy ýylyň 18-nji dekabrynda bir wagtda çykarmagy meýilleşdirýär. Iki blokbasteriň reliz gününiň gabat gelmegi sosial ulgamlarda kinofilmleriň atlaryndan ýasalan «DunesDay» adalgasynyň peýda bolmagyna getirdi.
Ulanyjylar bu wakany 2023-nji ýyldaky «Barbigeýmer» bilen deňeşdirýär. Şol ýyl «Barbi» we «Oppengeýmer» filmleri bir wagtda çykyp, jemgyýetde uly seslenme döredipdi.
Žurnalist Mettýu Belloni öz podkastynda häzirki wagtda kompaniýalaryň premýera tertibini üýtgetmek meýliniň ýokdugyny we Roždestwodan öňki baýramçylyk möwsüminde mümkin boldugyndan ýokary girdeji gazanmak isleýändigini habar berdi. Şol bir wagtyň özünde, indiki «Ar alyjylaryň» marketing kampaniýasy eýýäm başlady. Mysal üçin, Marvel studiýasy «Kyýamat gününiň» ilkinji tizerini hödürläp, Kris Ewansyň Stiw Rojersiň/Kapitan Amerikanyň keşbine gaýdyp gelýändigini tassyklady. «Alaň 3» barada wideo entek ýok.
Relizleri gabat getirmek pikirini Marvel kinoäleminde Şan-Çiniň roly bilen tanalýan aktýor Simu Lýu hem goldady. Ol auditoriýany bellenilen senä taýýarlanmaga çagyrdy.
Kinofranşizalaryň muşdaklary tematiki posterleri döretmäge girişdi.
