Microsoft öz esasy önümleriniň koduny 2030-njy ýyla çenli C we C++-dan Rust-a geçirmek meýilnamalary barada aýtdy. Bu işiň esasy bölegini inženerleriň goldamagynda ýöriteleşdirilen emeli aň agentleri ýerine ýetirer diýip, korporasiýanyň öňdebaryjy inženeri Galen Hant habar berdi.
Onuň aýtmagyna görä, gurama eýýäm şeýle uly geçiş üçin zerur bolan infrastrukturany ösdürmek bilen meşgullanjak hünärmen üçin iş ornuny açdy. Taslama ilkibaşdaky koduň grafyny döredýän algoritmik ulgama we uly üýtgeşmeleri girizmek üçin EA gurallaryna esaslanýar.
Şeýle-de, inžener iş prosesinde awtomatizirlemegiň roluny belledi: «Biziň EA infrastrukturamyz koda uly möçberli üýtgeşmeleri girizmek üçin algoritmler tarapyndan dolandyrylýan EA agentlerini birikdirmäge mümkinçilik berer».
Rust-a geçiş, ilkinji nobatda, howpsuzlyk bilen baglanyşyklydyr. Ol ýat bilen işlemekde näsazlyklaryň we howply gowşaklyklaryň ýüze çykmagynyň öňüni alýar. Ozal Azure-niň tehniki müdiri Rust-y täze işläp taýýarlamalar üçin ileri tutulýan dil hökmünde kesgitläpdi. EA tehnologiýalarynyň işe çekilýändigine garamazdan, 2030-njy ýyla çenli millionlarça kod setirini doly çalyşmak işi korporasiýanyň programma portfeliniň uludygy sebäpli ep-esli resurs talap eder.
