Türkmenistanda umumybilim berýän mekdepleriň okuwçylary we ýokary okuw mekdepleriniň talyplary üçin niýetlenen täze okuw kitaplary çapdan çykdy.
Täze neşirleriň biri «Türkmençe-parsça gepleşik sözlügidir». Bu gollanmanyň awtorlary Seýitnazar Seýdi adyndaky Türkmen döwlet mugallymçylyk institutynyň Gündogar dilleri we edebiýaty kafedrasynyň mugallymy Arzuw Setdarowa hem-de Bilim ministrliginiň baş hünärmeni Omargeldi Myradowdyr.
Gollanmada gündelik aragatnaşyklar üçin mowzuklaýyn bölümler, grammatik maglumatlar we leksiko-semantik adalgalar ýerleşdirilipdir. Okuw materialy ýönekeýden çaltlandyrylan görnüşe geçmek ýörelgesi esasynda guralypdyr we sözleýiş endiklerini ösdürmek üçin ýörite tapşyryklary öz içine alýar.
Şeýle hem, täze neşirleriň sanawyny rus dilinde okadylýan mekdepleriň XII synplary üçin niýetlenen «Jemgyýeti öwreniş» okuw kitaby doldurdy. Bu kitabyň üstünde mugallymçylyk institutynyň Jemgyýetçilik ylymlary kafedrasynyň wekilleri Peýşembaý Aýdogdyýew, Hurmagül Jumabaýewa we Goçmyrat Hanow hem-de Türkmenistanyň Döwlet, hukuk we demokratiýa institutynyň direktory Ýagmyr Nuryýew dagy işlediler.
Okuw gollanmasynyň mazmuny Bilim ministrliginiň okuw maksatnamasyna doly laýyk gelýär. Ol özünde nazary maglumatlary, şeýle hem her mowzuk boýunça barlag soraglaryny we amaly ýumuşlary jemleýär.
