Meşhur JerryRigEverything YouTube kanalynyň awtory Zak Nelson Samsung-yň ilkinji üç eplenýän Galaxy Z TriFold smartfonynyň berkligini barlady. Synagyň netijesi gynandyryjy boldy: enjam düzedip bolmajak derejede zeper aldy.
Synagyň esasy netijeleri:
- Tozan goragy (IP48): Bloger enjamyň IP48 gorag standartyna şübheli garady. Hakykatda, smartfonda hakyky tozan goragynyň ýokdugy anyklandy. Şarnirlerdäki magnitler sebäpli mehanizmiň içine düşen tozan zerrejikleri gysga wagtyň içinde gyjyrdyly sesleriň emele gelmegine sebäp boldy.
Ekran berkligi:
- Daşky ekran: Mohs şkalasy boýunça 6-njy we 7-nji derejelerde çyzylyp başlady.
- Içki ekran: Gorag plýonkasy gaty ýuka bolup, oňa hatda barmak dyrnagy bilen basylanda hem yz galýar.
- Oda çydamlylygy: Açyk alawyň täsiri astynda daşky ekran takmynan 1 minut, içki ekran bolsa bary-ýogy 10 sekunt çydap bildi. Her iki ekranda hem yzyna gaýtaryp bolmajak tegmiller emele geldi.
- Gurluşyň berkligi: Smartfony açyk ýagdaýynda tersine egmäge synanyşylanda, enjam birden döwüldi we hatardan çykdy. Alýumin gapdal paneller we plastmassa arka panel aňsatlyk bilen çyzyldy, ses sazlaýjy düwmeleri bolsa ýerinden gopup aýryldy.
Smartfon sökülende, Samsung-yň inženerleriniň batareýalary korpusyň her üç bölegine aýratyn ýerleşdirendigi mälim boldy. Bloger Zak Nelsonyň aýtmagyna görä, enjamyň aşa ýukalygy we birikdiriji şarnirleriň köplügi ony mehaniki basyşlara garşy örän ejiz edýär.
