Türkmenistanyň HASAR kompaniýasynyň «Şokolad örtükli gawun kaky» süýjüleriniň gaplamasynyň dizaýny Bütindünýä intellektual eýeçilik guramasynyň (BIEG) ýubileý neşirine goşuldy. Bu neşir Gaaga ylalaşygynyň 100 ýyllygyna bagyşlanyp, onda hasaba alnan 2 milliondan gowrak senagat nusgalarynyň arasyndan saýlanyp alnan 100 sany iň özboluşly dizaýn çözgüdi ýerleşdirildi diýip, «Neýtralnyý Türkmenistan» gazeti habar berýär.
Bu dizaýnyň awtory dizaýner Serdar Poladowdyr. Senagat nusgasy 2018-nji ýylyň 18-nji dekabrynda DM/201 765 belgisi bilen hasaba alnypdyr. «Şokolad örtükli gawun kaky» süýjüsiniň gaplamasy türkmen halkynyň milli aýratynlyklaryny özünde jemleýär. Görüş çözgütleri ýurdumyzyň tebigy landşaftyna we mirasyna esaslanýar, onda günorta gawunlarynyň süýjüligi däp bolan gündogar süýjülikleriniň baýlygy bilen utgaşýar diýlip, neşirde bellenilýär.
Ýubileý neşirine Gaaga ulgamyna agza bolan 112 ýurduň 46-synyň wekilleri girdi. Garaşsyz Döwletleriň Arkalaşygyna (GDA) agza ýurtlaryň arasyndan bu kitapda Türkmenistanyň, Russiýanyň we Gyrgyzystanyň taslamalaryna orun berildi.
Kitap çäkli mukdarda neşir edildi we ony guramanyň resmi saýtyndan tapmak mümkindir.
