Meta kompaniýasy kese ekranly telewizorlarda mazmunlary görmek üçin niýetlenen Instagram for TV programmasyny işe girizýär. Sosial ulgamyň täze görnüşi uly ekranlara uýgunlaşdyryldy we ol, esasan, wideo mazmunlary görmäge gönükdirilendir.
Programma Amazon Fire TV enjamlarynda synagdan geçirmek üçin ABŞ-da elýeterli boldy. Kompaniýanyň habar bermegine görä, ýakyn aýlarda goldanylýan enjamlaryň sanawy giňeler we hyzmat beýleki sebitlerde-de elýeterli bolar.
Ulanyjylar bäş sany hasaba alnan ýazga (akkaunta) çenli goşup bilerler ýa-da diňe teleýaýlymlary görmek üçin aýratyn akkaunt döredip bilerler. Wideorolikler gyzyklanmalara görä mowzuklaýyn kanallara bölünen, şeýle hem gözleg funksiýasy göz öňünde tutulan.
Meta, şeýle hem bu hyzmatyň mundan beýläk-de ösdüriljekdigini mälim etdi. Geljekde programmany smartfonyň kömegi bilen dolandyrmak, täzelikler lentasyny paýlaşmak mümkinçiligini goşmak we interfeýs boýunça nawigasiýany kämilleşdirmek meýilleşdirilýär.
