Lancia kompaniýasy brendiniň Dünýäniň ralli çempionatyna (WRC) gaýdyp gelmegi mynasybetli Eberhard & Co sagat öýi bilen hyzmatdaşlykda taýýarlanan çäkli nusgadaky goşar sagadyny tanyşdyrdy. Jemi 360 sany nusgada öndüriljek bu sagatlaryň her biriniň bahasy 1980 ýewro bolar.
Bu aksessuaryň çykarylmagy brendiň sport modellerini aňlatmak üçin ulanylan meşhur HF (High Fidelity) logotipiniň täzeden dikeldilmegi bilen gabat geldi. Bu nyşan hronometriň siferblatynda ýerleşdirilipdir.
Sagadyň 10,45 mm galyňlykdaky polat korpusy 50 metre çenli suwa çydamlylygy üpjün edýär, hronometriň işleýiş ätiýaçlygy bolsa 38 sagada deňdir. Alyjylara gara, ak ýa-da gök siferblatly nusgalar, şeýle hem polat bilezikli ýa-da gyzyl gyra tikenli deri kemerli görnüşleri saýlap almak mümkinçiligi hödürlenýär.
Lancia Corse zawod toparynyň 25 ýyllyk arakesmeden soň, 2026-njy ýylyň ýanwarynda dünýä birinjiliginiň ýollaryna gaýdyp gelmegine garaşylýar. Monte-Karlo tapgyrynda WRC2 kategoriýasynda iki sany Ypsilon Rally2 HF hetçbegi bäsleşer. Ekipažlara bolsa ussat sürüjiler Ýohan Rossel we Nikolaý Grýazin ýolbaşçylyk ederler.
