Samsung Electronics kompaniýasy eplenýän smartfonlar ugruny ösdürmegini dowam etdirýär we täze modeli — Galaxy Wide Fold-y taýýarlaýar. ETNews neşiriniň habar bermegine görä, bu enjam ilkinji eplenýän iPhone-a jogap hökmünde taýýarlanyp, oňa meňzeş ölçeglere we ekran gatnaşygyna eýe bolmaly.
Galaxy Wide Fold-yň indiki ýylyň güýzünde tanyşdyrylmagyna garaşylýar. Smartfon 4:3 gatnaşykly, 7,6 dýuýmlyk içki OLED displeý bilen üpjün ediler. Bu format suratlary we web sahypalaryny görmek üçin has amatly hasaplanýar. Deslapky maglumatlara görä, Apple-iň eplenýän iPhone-y hem meňzeş ölçegli — 7,58 dýuýmlyk ekran bilen üpjün ediler.
Habar berlişine görä, Apple kompaniýasy ekranyň açylanda emele gelýän epin yzynyň känbir bildirmezligi üçin üýtgeýän galyňlykdaky aşa inçe aýna ulanmagy meýilleşdirýär. Bellemeli zat, hytaýly öndürijileriň hem şuňa meňzeş çözgüdi ulanmagy göz öňünde tutýandygy sebäpli, Apple bu tehnologiýany ornaşdyran ilkinji kompaniýa bolman hem biler.
Şeýle hem Galaxy Wide Fold 5,4 dýuýmlyk daşarky displeýe eýe bolar we 25W simsiz zarýad berijini goldar. Bu zarýad beriji tehnologiýasynyň 2026-njy ýylyň başynda Galaxy S26 Ultra bilen birlikde peýda bolmagyna garaşylýar. TrendForce-yň çaklamasyna görä, Apple-iň ilkinji eplenýän smartfonynyň çykarylmagy bilen, bu segmentiň global bazardaky paýy 2027-nji ýyla çenli 1,6%-den 3%-e çenli ýokarlanyp biler.
