Londonda üç gün aratapawut bilen britaniýaly köçe suratkeşi Benksiniň stilinde ýerine ýetirilen iki graffiti peýda boldy. Bu barada BBC News habar berýär.
Diwar suratlarynyň ikisinde-de ýerde ýatan iki çaga suratlandyrylýar. Olar rezin ädik, palto we gyş şapkasyny geýen bolup, biri barmagy bilen ýokaryk, ähtimal, ýyldyzlary görkezýär.
Birinji surat 19-njy dekabrda britan paýtagtynyň merkezindäki Centre Point Tower-iň golaýynda, ikinjisi 22-nji dekabrda şäheriň günbataryndaky Beýsuoter sebitinde garažyň üstünde peýda boldy. Benksi Beýsuoterdäki graffitini Instagram-da ýerleşdirmek bilen, onuň hakykydygyny tassyklady, ýöne birinji suratyň peýda bolmagyna teswir bermedi.
Suratkeş Deniel Lloýd-Morgan Centre Point-däki surat barada aýtmak bilen, ýerleriň saýlanmagynyň öýsüz çagalara ünsi çekmek islegi bilen baglanyşykly bolup biljekdigini çaklady. «Bu örän hereketli ýer. Adamlaryň saklanmaýandygy simwolik zat. Olar öýsüzleriň ýanyndan geçip, olaryň ýerde ýatandygyny görmeýär… Hemmeler wagtyny gowy geçirýär, ýöne Roždestwoda wagtyny gowy geçirmeýän çagalar köp» — diýip, ol belledi.
Benksiniň döredijiliginiň muşdagy Jeýson Tomkins bu eseri «öýsüzligiň aýdyň beýany» diýip hasaplaýar. Onuň pikiriçe, graffitide Benksiniň 2018-nji ýylyň dekabrynda döreden meşhur suratyndaky gahryman şekillendirilen bolmaly. Şol suratda çagajyk agzy bilen gar tozgalaryny tutýar, ýöne olar kül bolup çykýar.
Tomkins suratkeş üçin şol bir oglanjygy gaýtalap ulanmagyň adaty däldigini belleýär.
