Dohada 19-27-nji dekabr aralygynda geçirilýän Agyr atletika boýunça 10-njy halkara Katar kubogynda (Qatar Weightlifting Cup) türkmenistanly türgenler Bunýat Raşidow we Ogulşat Amanowa alty medal gazandylar. Bu barada Katar sport metbugat komiteti (The Qatar Sports Press Committee) habar berdi.
67 kg çenli agram derejesinde çykyş eden Bunýat Raşidow toparyna üç baýrak getirdi. Ol silterläp götermekde 145 kg netije bilen ýeňiji boldy, itekläp götermekde 169 kg bilen ikinji ýeri eýeledi we jemi iki görnüşiň netijesi boýunça (314 kg) altyn medala mynasyp boldy.
45 kg çenli agram derejesinde çykyş eden Ogulşat Amanowa hem hormat münberine üç gezek çykdy. Ol silterläp götermekde 77 kg, itekläp götermekde 93 kg we jemi iki görnüşiň netijesi boýunça 170 kg görkeziji bilen üç sany bürünç medal gazandy.
Katar kubogy bir wagtyň özünde üç sany iri ýaryşy öz içine alýar: 2025-nji ýylyň 10-njy Katar halkara kubogy, ýetginjekleriň, ýaşlaryň we uly ýaşlylaryň arasyndaky Arabystan çempionaty hem-de Agyr atletika boýunça Günbatar Aziýa çempionaty.
