Ýaponiýanyň Milli maglumat we kommunikasiýa tehnologiýalary instituty (NICT), şäher gurşawynda lazer şöhlesiniň kömegi bilen maglumatlary 2 Tbit/s tizlikde üstünlikli geçirip, erkin giňişlikdäki optiki aragatnaşyk (FSO) boýunça dünýä rekordyny yglan etdi. Eurekalert neşiriniň ýazmagyna görä, bu üstünlik kämilleşdirilen ykjam optiki terminallaryň işlenip düzülmegi netijesinde mümkin boldy.
Institut bu synagyň 2025-nji ýylyň aprel aýynda Tokioda geçirilendigini habar berdi. Maglumatlaryň geçirilmegi atmosferanyň güýçli turbulentliligi (howa akymlarynyň bökdençligi) şertlerinde, iki sany kiçi göwrümli terminalyň — ýokary öndürijilikli FX we ýönekeýleşdirilen ST modelleriniň arasynda, 7,4 km aralykda amala aşyryldy. Umumy 2 Tbit/s tizlik, her biri 400 Gbit/s bolan bäş kanalyň tolkun uzynlygy boýunça utgaşdyrylmagy (multiplexing) arkaly gazanyldy.
Bu taslamanyň esasy öňegidişligi enjamlaryň kiçeldilmegidir: öň beýle terabit tizlikleri diňe uly göwremli stasionar enjamlarda görkezilipdi.
Täze döredilen terminallar kiçi emeli hemralarda (meselem, CubeSat) we stratosfera platformalarynda gurnamak üçin amatlydyr. Bu bolsa howa we kosmos aragatnaşyk ulgamlary üçin täze mümkinçilikleri açýar.
Geljekki 10 ýylyň dowamynda, 5G/6G nesillerinden hem öňe geçjek aragatnaşyk taslamalarynyň çäginde, howa we kosmos torlary üçin köp terabitlik optiki magistrallary döretmek meýilleşdirilýär. Bu bolsa global kommunikasiýalaryň maglumat geçirijilik ukybyňy düýpli ýokarlandyrar.
