Sanly maliýe hyzmatlary pudagynda işleýän Remitly kompaniýasy gözleg geçirip, dünýäde stress derejesi has ýokary we pes bolan şäherleri kesgitledi. Gözlegiň netijeleri barada Time Out habar berýär.
Bilermenler dünýäniň 170-den gowrak şäherini seljerip, stress derejesine täsir edip biljek bäş ölçeg boýunça baha berdi. Olara 10 kilometr geçmek üçin gerek bolan wagt we ýol dyknyşygy, azyk önümleriniň, ulag, kommunal we beýleki hyzmatlaryň bahalaryny göz öňünde tutmak bilen ýaşaýyş çykdajylarynyň indeksi, şeýle-de saglygy goraýyş ulgamynyň elýeterliligi, jenaýatçylyk derejesi we howanyň hapalanmagynyň ortaça görkezijisi degişlidir. Kärende ýa-da ipoteka tölegleri hasaba alynmady.
Her şäher ähli ölçegler boýunça baha aldy, şondan soň maglumatlar on ballyk şkala boýunça umumy «stress indeksine» birleşdirildi.
Netijede, birahatlyk boýunça şäherleriň reýtingine Nýu-Ýork (ABŞ), Dublin (Irlandiýa), Mehiko (Meksika), Manila (Filippinler), London (Beýik Britaniýa), Milan (Italiýa), Afina (Gresiýa), San-Paulu (Braziliýa), Turin (Italiýa) we Kalkutta (Hindistan) girdi. Şol bir wagtyň özünde, dürli sebitlerde stressiň sebäpleri tapawutlanýar: Latyn Amerikasynyň ýurtlarynda adamlar, köplenç, howpsuzlyk meselesinden, Ýewropada we Demirgazyk Amerikada bolsa ýaşaýyş bahasynyň ýokary bolmagyndan zeýrenýär.
Iň ynjalykly şäherler Eýndhowen we Utreht (Niderlandlar), Kanberra (Awstraliýa), Tallin (Estoniýa), Groningen (Niderlandlar), Tronheým we Bergen (Norwegiýa), Portu (Portugaliýa), Brisben (Awstraliýa) we Rotterdam (Niderlandlar) boldy.
Şeýle-de, bilermenler Niderlandlaryň, umuman, birbada dört şäheriň ilkinji onluga girendigini göz öňünde tutsaň, stress derejesiniň iň pes bolan ýurdy hasaplanyp biljekdigini belleýär.
