Beýik Britaniýanyň Mançester şäherindäki Co-op Belle Vue Academy orta mekdebi okuwa gatnaşygy ýokarlandyrmak üçin adatdan daşary usuly ulandy: Mirror gazetiniň habar bermegine görä, okuwçylary höweslendirmek üçin olara mugt telewizorlar we welosipedler berlip başlandy.
Mekdep okuwa yzygiderli gatnaýan okuwçylary höweslendirýär. Olar gazanan üstünlikleri üçin ýörite ballar alýarlar, soňra bolsa bu ballary gymmat bahaly baýraklaryň utuşly oýnuna gatnaşmak üçin peteklere çalşyp bilýärler. Baýraklaryň arasynda sport pökgüleri, şokoladlar, öý hojalyk enjamlary we 100 funt sterlinglik sowgatlyk şahadatnamalary (kuponlar) bar. Iň soňky geçirilen utuşly oýunda baýraklaryň umumy bahasy 2000 funt sterlingden (takmynan 2680 dollar) geçdi.
Mekdep direktory Skott Fletçer bu başlangyjy 2022-nji ýylda wezipesine bellenen badyna girizdi. Ähli sowgatlar mekdep býujetiniň hasabyna satyn alynýar. Geçen iki ýylyň dowamynda okuwçylaryň sebäpsiz okuwdan galmalary 20%-den 10,5%-e çenli azaldy.
“Belle Vue mekdebinde biz ýyl-ýyldan ýokary gatnaşygyň has gowy netijeleri berýändigini görýäris. Bu, okuwçynyň geljekdäki üstünligini kesgitleýän iň güýçli faktorlaryň biridir we bu görkezijini gowulandyrmak doly biziň öz elimizde” diýip, Skott Fletçer belledi.
