Türkmenistanyň Döwlet gümrük gullugynyň wekilleriniň Russiýa Federasiýasyna amala aşyran bäş günlük iş saparynyň dowamynda taraplar 2026–2028-nji ýyllar üçin bilelikdäki işleriň meýilnamasyny ylalaşdylar.
Bu resminamanyň durmuşa geçirilmegi gümrük amallaryny kadalaşdyrmaga, serhetüsti söwdanyň netijeliligini we howpsuzlygyny ýokarlandyrmaga gönükdirilendir. Täze "ýol kartasy" sanlaşdyrmak, maglumatlary operatiw alyşmak, hukuk goraýjylyk işini güýçlendirmek we hünärmenleri taýýarlamak ýaly meseleleri öz içine alýar.
Saparyň çäklerinde türkmen hünärmenleri Moskwa gümrük wekilhanasynyň Elektron deklarasiýa merkezinde sanly süzgüçleriň kömegi bilen amallary çaltlandyrmak gurallary bilen tanyşdylar. Russiýanyň Gümrük akademiýasynda degişli hünärmenler üçin bilim standartlary maslahatlaşyldy.
Saparyň maksatnamasyna Russiýanyň Federal gümrük gullugynyň Kinologiýa merkezine baryp görmek hem girdi. Ol ýerde gulluk itlerini taýýarlamagyň usullary öwrenildi.
Gönüden-göni alnyp barlan gepleşikler taraplaryň hyzmatdaşlygy berkitmäge gyzyklanma bildirýändigini tassyklady. Edaralaryň arasyndaky bu gatnaşyklar Türkmenistan bilen Russiýa Federasiýasynyň arasyndaky söwda-ykdysady baglanyşyklary ösdürmegiň çäklerinde amala aşyrylýar.
