Pekindäki "X Muzeýinde" bir çaga tötänden bahasy 320 000 dollardan gowrak bolan altyn täje zeper ýetirdi. "Need to Know" neşiriniň habar bermegine görä, waka oglan aýna witrina degenden soň ol gaçyp, içindäki täç döwlüpdir.
Agramy 2 kilograma golaý bolan täç arassa altyndan elde ýasalypdyr. Ol gözellik blogeri Çžan Kaýä degişli bolup, eseriň awtory onuň adamsy, suratkeş Çžan Ýudundyr. Bilermenler täji dikeltmegiň bahasyny 56 000 dollar möçberinde kesgitlediler.
Hytaýly hukukçylar kämillik ýaşyna ýetmedik çaganyň hereketleri üçin jogapkärçiligi onuň kanuny wekilleriniň çekýändigini düşündirdiler. Emma muzeýiň wekili gorag gutusynyň ýeterlik derejede berkidilmändigini boýun aldy, bu bolsa guramaçylaryň hem ýalňyşynyň bardygyny görkezýär.
Täjiň eýesi çaganyň maşgalasyndan maddy öwezini doluş talap etmek niýetiniň ýokdugyny mälim etdi. Ol täjiň ätiýaçlandyrylandygyny we häzirki wagtda diňe ätiýaçlandyryş talabyny resmileşdirmek boýunça maslahat alýandygyny aýtdy. Şol bir wagtyň özünde, täjiň özi üçin bahasyna ýetip bolmajak gymmatlygydygyny, sebäbi onuň ýörite toýlary mynasybetli ýasalandygyny belledi.
"Muzeý X" — ýaş kolleksiýaçylar tarapyndan esaslandyrylan hususy häzirki zaman sungat muzeýidir. Bu merkez täze nesil suratkeşleriň işlerini goldamaga we medeni dürlüligi görkezmäge gönükdirilendir. Wakanyň bolan güni sergide jemi 87 sany häzirki zaman suratkeşiniň işleri görkezilýärdi.
