Samsung kompaniýasy Galaxy Ring 2 akylly ýüzüginiň önümçiligini yza süýşürmek kararyna geldi. "Dealsite" neşiriniň habaryna görä, akylly ýüzük bazarynda liderleriň biri bolan "Oura" kompaniýasy bilen dowam edýän patent dawasy Samsung-da ikirjiňlenmeleriň döremegine sebäp boldy.
Ozal täze önümiň geljek ýylyň başynda geçiriljek Galaxy Unpacked tanyşdyrylyşynda görkezilmegine garaşylýardy. Emma häzirki wagtda täze modeliň geljegi näbelli bolup galýar. Noýabr aýynda Oura kompaniýasy ABŞ-nyň Halkara söwda komissiýasyna şikaýat edip, Samsung, Reebok, Zepp we Nexxbase ýaly öndürijileri öz patentlerini bozmakda aýyplady.
Bazaryň häzirki modele bolan gatnaşygy hem ýagdaýy çylşyrymlaşdyrýar. Ýüzügiň ilkinji tapgyry gaty çalt satylan hem bolsa, alyjylaryň başlangyç gyzyklanmasy durnukly islege öwrülmedi.
Galaxy Ring-iň birinji nesli 2024-nji ýylyň ýanwarynda hödürlenipdi. Ikinji wersiýanyň işlenip düzülýändigi baradaky maglumatlar bolsa şol ýylyň tomsunda peýda boldy.
