Ahal welaýatynda Gökdepe etrabynyň S.A.Nyýazow adyndaky geňeşliginiň çäginde arassalanan agyz suwuny öndürýän täze kärhana açyldy.
Täze kärhana Türkmenistanyň Senagatçylar we telekeçiler birleşmesiniň agzasy bolan «Gül Zaman» hojalyk jemgyýetine degişlidir. Üç gektar meýdanyň çäginde ýokary talaplara laýyklykda gurlan, Türkiýäniň öňdebaryjy kompaniýalarynyň tilsimatlary ornaşdyrylan döwrebap kärhananyň ýyllyk kuwwaty 1,25 million dekalitr suwa barabardyr. Bu ýerde ekologiýa taýdan arassa agyz suwy göwrümi 0,33; 0,5; 0,75; 1,5 litr bolan ýörite gaplara gaplanyp, «Zamana», «Mermer», «Durna» haryt nyşany bilen ilata ýetiriler. Täze kärhananyň ulanmaga berilmegi bilen, oba ilaty üçin iş orunlarynyň 50-ä golaýy döredi.
