Britaniýadan är-aýal soňky ýedi ýylda ikinji gezek 1 mln funt sterling möçberde lotereýa utdy. Metro neşiri ýeňijileriň nobatdaky uly şowlulyga garamazdan, öňki işinde zähmet çekmegi dowam etdirmegi meýilleşdirýändigini ýazýar.
Baýragyň eýeleri 49 ýaşly kurýer Riçard Dewis we onuň psihiatrik kömek ulgamynda işleýän 43 ýaşly aýaly Feý Dewis boldy. Olar ilkinji millionyny 2018-nji ýylda alypdy. 2025-nji ýylyň noýabrynda är-aýal ýene-de bäş sany we bonus şaryny bilip, jekpot utdy. Käbir bilermenler şeýle wakanyň bolmak ähtimallygyny 24 trilliondan bir gezek diýip hasaplaýar.
Ýeňijiler muny «oňyn pikirlenmek» bilen baglanyşdyrýar. Birinji ýeňişden soň Feý Dewis işden gidip, maslahat we terapiýa ugrunda ikinji ýokary bilimi alyp bildi. Şondan soň hususy praktikany açdy. Onuň adamsy Riçard dellekçi kärini kurýer işine çalyşdy. Onuň aýtmagyna görä, ol dynç günsüz diýen ýaly işleýär we mundan lezzet alýar.
Birinji utuşdan soň maşgala haýyr-sahawat maksatlaryna awtomobilleri, ýerli regbi toparyna mikroawtobus sowgat etdi we dostlaryna hem garyndaşlaryna maliýe kömegini berdi. Bu gezek är-aýal gyssagly netije çykarmakdan saklanmak isleýär.
