Ýewropanyň Suwasty Arheologiýa Institutynyň (IEASM) ylmy işgärleri takmynan 2000 ýyl mundan ozal Aleksandriýa portunyň golaýynda gark bolan gezelenç gämisiniň galyndylaryny tapdylar. Gurluşy we maksady boýunça bu tapyndyny häzirki zaman superýahtalary bilen deňeşdirip bolýar.
Gadymy awtorlaryň işlerinde şeýle gämiler barada köp sanly maglumatlar duş gelse-de, alymlar şu wagta çenli olaryň hiç biriniň galyndylaryny tapmandylar diýip, IEASM-iň ýolbaşçysy Frank Goddio habar berdi. Ol gäminiň biziň eýýamymyzyň 365-nji ýylda bolan güýçli ýertitremesi wagtynda heläkçilige uçrap, suwa batandygyny çaklaýar.
Uzynlygy 28 metr bolan gäminiň galyndylary 7 metr çuňlukda, galyň çökündi gatlagynyň aşagynda gizlenip ýatan ýerinden tapyldy. Hünärmenleriň hasaplamalaryna görä, "ýahtanyň" asyl uzynlygy 35 metr, ini bolsa 7 metr bolupdyr. Gäminiň düýbi tekiz bolup, ol diňe saý suwly ýerlerde ýüzmek üçin niýetlenipdir. Ony 20 sany kürekçi herekete getiripdir.
Gadymy çeşmelere görä, diňe örän baý adamlaryň, şol sanda Ptolemeýler nesilşalygynyň wekilleriniň ýa-da ýokary derejeli döwlet işgärleriniň satyn alyp bilýän şeýle gämilerinde köplenç kaşaň otaglar (kaýutalar) bolupdyr.
