Porsche kompaniýasy 911 GT3 superkarynyň "90 FA" diýlip atlandyrylan ýörite nusgasyny tanyşdyrdy. Bu model ilkinji Porsche 911-iň keşbini döreden meşhur dizaýner Ferdinand Aleksandr Porşeniň 90 ýaşyna bagyşlandy. Jemi 90 nusga bilen çäklendirilen bu seriýa üçin sargytlar aprel aýynda açylar.
Täze model 911-iň döredijisiniň şahsy awtoulagynyň stilinde dizaýn edildi. Awtoulag üçin Ferdinand Aleksandryň 1980-nji ýyllarda münen ulagynyň reňkini gaýtalaýan özboluşly "FA Greenmetallic" reňki işlenip düzüldi. Şeýle hem, kupe klassiki Fuchs stilindäki diskler we yzky gapagynda altyn çaýylan ýörite nyşan bilen üpjün edildi.
Awtoulagyň salonynda goňur deri we gözenekli mata ulanyldy. Salonda mata ulanmak baradaky piki dizaýneriň ogly Marka degişli bolup, ol kakasynyň hut şeýle matadan tikilen kurtkalary geýmegi gowy görendigini belleýär.
Geçiriji gutusynyň agaçdan ýasalan tutawajyna Porşeniň goly haşamlanyp ýazyldy. Şeýle ýazgy we "One of 90" diýen ýadygärlik tagtajygy ulagyň içki panelinde hem ýerleşdirildi.
Awtoulagy satyn alanlara salonyň bezegindäki materiallardan taýýarlanan syýahat sumkasy we Porsche Design tarapyndan öndürilen ýörite goşar sagady sowgat berler. Bu sagadyň dizaýny 1972-nji ýylda Ferdinand Aleksandr Porşeniň özi tarapyndan döredilen meşhur "Chronograph I" modeliniň stilinde taýýarlandy.
