Geçen ýyl dünýäde sanly hyzmatlaryň eksporty 4,8 trillion dollara ýetdi. Bu görkeziji global hyzmatlar eksportynyň umumy göwrüminiň üçden iki böleginden gowragyny düzýär. Bütindünýä Söwda Guramasynyň (BSG) maglumatlaryna görä düzülen 30 sany öňdebaryjy ýurduň sanawynda ABŞ birinji orny eýeledi. Amerikanyň sanly eksporty 741 milliard dollara ýa-da dünýäniň umumy eksportynyň 15%-ine deň boldy.
Sanly eksport kategoriýasyna Amazon kompaniýasynyň ägirt uly bulut (cloud) biznesi, Spotify-yň striming hyzmaty, Meta we Google-yň mahabat platformalary, onlaýn bilim, maliýe hyzmatlary hem-de beýleki uzak aralykdan amala aşyrylýan hyzmatlar girýär.
Beýik Britaniýa 488 milliard dollarlyk satuw bilen sanawda ikinji orny eýeledi. Ýurtda takmynan 3,2 million iş ornunyň göni tehnologiýa we maliýe pudaklary arkaly sanly eksport bilen baglanyşyklydygy bellenilýär.
Irlandiýa 425 milliard dollarlyk sanly hyzmat eksporty bilen üçünji orunda durýar. Irlandiýanyň görkezijileri bir ýylyň içinde 24% ösdi — bu dünýäniň iň uly eksportçylarynyň arasynda iň ýokary ösüş depginidir. Ýurduň satuw möçberiniň beýle ýokary bolmagy Google ýaly iri tehnologiýa ägirtleriniň Ýewropadaky baş edaralarynyň (headquarters) hut şol ýerde ýerleşýänligi bilen düşündirilýär.
