2026-njy ýylyň 14-nji aprelinde "100 ýewro bir Pikasso" (1 Picasso for 100 Euros) atly halkara haýyr-sahawat çäresi geçiriler diýip, Hypebeast neşiri habar berýär. Çäräniň baş baýragy — Pablo Pikassonyň 1941-nji ýylda döreden "Aýalyň kellesi" ("Tête de femme") atly eseri bolar.
Gatnaşyjylar bary-ýogy 100 ýewro lotereýa petegini satyn alyp, takmynan bahasy 1,1 million dollar bolan eseri utup almak mümkinçiligine eýe bolarlar.
Bu eser guaş boýagy bilen çal öwüşginlerde çekilen portretdir. Onda suratkeşiň ylham berijisi we söýgülisi Dora Maar şekillendirilýär, olar 1936-njy ýylda tanşypdyrlar.
Petek satuwyndan gelip gowşan serişdeler Alsgeýmer keselini öwrenmek bilen meşgullanýan Fransuz gaznasyna (Fondation Recherche Alzheimer) geçiriler.
2026-njy ýyldaky utuşly oýun hasap boýunça üçünji bolar. 2013-nji ýyldaky ilkinji lotereýada pensilwaniýaly Jeffri Gonano "Kotelokly adam" ("L'Homme au Gibus") atly eseri utupdy. 2020-nji ýylda bolsa italiýaly Klaudiýa Borgonýo "Natýurmort" ("Nature Morte") kartinasynyň eýesi bolupdy.
