ErreErre Fuoriserie firmasy ForGiotto atly adaty bolmadyk taslamanyň üstünde işläp başlandygyny yglan etdi. Bu wintaž sportkar meşhur dizaýner we konstruktor Jiotto Bizzarrinä bagyşlanandyr.
Geljekki täze awtoulagyň daşky görnüşi Bizzarrini tarapyndan 1960-njy ýyllaryň başynda "Le Man" ýaryşlaryna gatnaşmak üçin dizaýn edilen, Ferrari 250 GT Breadvan ("çörek maşyny") özboluşly ýaryş awtoulagyny ýatladýar.
ForGiotto-nyň Breadvan-yň takyk nusgasy bolman, eýsem onuň häzirki zaman interpretasiýasy bolmagyna garaşylýar. Yzky bölegi asyl nusgasyndakydan az burçly edilse-de, awtoulagyň öň tarapy Bizzarrininiň beýleki işlerini, esasanam Bizzarrini 5300 GT modelini ýatlatmak üçin üýtgedildi. Kuzow panelleri üçin elde ýasalmagy meýilleşdirilýän alýumin listleri ulanylar. Salonda hem alýumin, deri we agaç bezegleri bolar.
V12 hereketlendirijili asyl Breadvan-dan tapawutlylykda, ForGiotto üçin inženerler Chevrolet-dan dört sany karbüratorly, kuwwaty 400 at güýjünden geçmäge ukyply 5,4 litrlik V8 hereketlendirijisini taýýarladylar. Motor dört basgançakly mehaniki tizlik gutusy bilen bilelikde işlär.
ErreErre taslamasynyň ilkinji bäş nusgasynyň esasyny, Bizzarrininiň birnäçe modeliniň işlenip düzülmegine gatnaşan Iso markasynyň asyl şassisi düzýär. Kompaniýanyň wintaž ätiýaçlyk şaýlarynyň birnäçe toplumyny satyn alyp bilendigi aýdylýar. Seriýanyň galan awtoulaglary has döwrebap platformalara esaslanar.
ForGiotto-nyň bahasy 690 müň ýewrodan az bolmaz.
