Disney “Haýwanlar şäheri-2”, “Moana” we “Doňan ýürek” multfilmleriniň mysalynda studiýanyň animasion filmleriniň dörediliş prosesini görkezýän “Biz muny nädip edýäris” (What we Do) onlaýn-portalyny işe girizdi.
Saýtda möhüm tapgyrlar jikme-jik beýan edilýär: ideýanyň döreýşi, personažlaryň we lokasiýalaryň wizual obrazlaryny döretmek, ssenarini ýazmak, sesi ýazgy etmek, sahnalaryň animasiýasy we postprodakşen. Mysal üçin, “Haýwanlar şäheri-2” dowamlylygy 37 sekuntdan 6 minuta çenli bolan 41 bölümden ybarat.
Taslamalaryň üstünde ýüzlerçe hünärmen işleýär: ssenariçiler, hudožnikler, animatorlar, prodýuserler, montaž edijiler we tehnologlar. Öz başarnyklaryny kämilleşdirmek üçin olar yzygiderli kino önümçiligi, sungat we storitelling boýunça leksiýalara we workşoplara gatnaşýar. Hudožnikler we režissýorlar 65 milliondan gowrak materialy saklaýan Walt Disney Animation arhiwinden işjeň peýdalanýar.
Portalda aýratyn üns önümçiligiň esasynda duran tehnologiýalara gönükdirilýär. Hudožnikleriň we inženerleriň hyzmatdaşlygy taslamalara derrew üýtgeşme girizmäge we uly möçberdäki maglumatlary netijeli dolandyrmaga mümkinçilik berýär. Bu 3D modelleri döretmekden başlap, ahyrky renderinge çenli tutuş prosese degişlidir.
Portal tomaşaçylara ýüzlerçe adamyň çylşyrymly işiniň nädip taýýar multfilme öwrülýändigini görmäge we haýsy tehnologiýalaryň we çemeleşmeleriň Disney-e dünýä derejesindäki animasiýany döretmekde kömek edýändigine düşünmäge mümkinçilik berýär.
