Londonda Roždestwonyň öňüsyrasynda bug bilen işleýän Roždestwo otlusy demir ýollara çykar. Otly 1951-nji ýylda gurlan we britan demirýol romantikasynyň nyşanyna öwrülen «Britaniýa» lokomotiwine tirkeler diýip, Kazinform habar berýär.
Syýahat 90 minut dowam eder: otly paýtagt boýunça aýlanyp, Wiktoriýa wokzalyna gaýdyp geler. Retro-wagonlarda ýolagçylary Santa Klaus we onuň elfleri garşy alar. Myhmanlar üçin mini-sahnalar, aýdymdyr sazlar we ulular hem çagalar üçin niýetlenen interaktiw çykyşlar taýýarlandy.
Kiçijik ýolagçylara sowgatlar, öwrediji toplumlar, süýjülikler we içgiler garaşýar. Ulular ýaňyja demlenen çaýdan ýa-da kofeden lezzet alyp, içi miweli Roždestwo pirogyny dadyp görüp biler.
Roždestwo otlusy 20 – 22-nji dekabrda hereket eder. Guramaçylar hyzmatyň üç derejesini hödürleýär. Adaty orunlar – umumy wagonda. Stoly bolan has rahat orunlar wintaž çyraly we perdeli salonda ýerleşýär. Iň ýokary dereje ýokary gizlinlik we rahatlyk bilen aýratyn kupeni göz öňünde tutýar.
Syýahatyň bahasy saýlanan hyzmat derejesine baglylykda 55 funt sterlingden 600 funt sterlinge ýetýär.
