Täzelenen Open Astra-nyň global premýerasy soňky dört ýylda modeliň ilkinji uly täzelenmesi boldy.
Dizaýnerler modeliň umumy durkuny saklady, ýöne öň bölegi düýpli üýtgedildi. Opel Vizor ulgamy has giň LED elementlerine we yşyk bilen ýanýan Opel Blitz logotipine eýe boldy. Şeýle-de, bamper üýtgedildi we 17 hem 18 dýuým diametrli täze tigir diskleri hödürlendi. Täzelenme hetçbege we Astra Sports Tourer uniwersalyna hem täsir etdi.
Salonda täze çözgütler peýda boldy. Indi ähli wersiýalar Intelli-Seats oturgyçlary bilen üpjün edilýär. Olar gaýtadan işlenen ReNewKnit materialyndan taýýarlandy we ýyladyjy, massaž ulgamlary hem-de sazlamalar toplumy bilen elýeterlidir. Iki sany 10 dýuýmlyk ekran bilen hödürlenen muldimedia ulgamynyň we sanly enjam paneliniň interfeýsi has ýönekeý we düşnükli boldy.
Hereketlendiriji hatary täzelenen Peugeot 308 bilen gabat gelýär. Oňa 129 at güýjüni (a.g.) berýän 1,5 litrlik dizel hereketlendirijisi, 143 at güýjüni berýän 1,2 litrlik hereketlendirijiniň esasynda «ýumşak» gibrid, 192 a.g. kuwwatly 1,6 litrlik hereketlendirijiniň esasynda zarýad berilýän gibrid, şeýle-de 154 a.g. kuwwatly doly elektrik wersiýasy girýär.
Elektrik wersiýasy WLTP boýunça 454 km çenli ýol geçmäge mümkinçilik berýän 58 kWt/sag sygymly batareýa bilen enjamlaşdyryldy.
Täzelenen Opel Astra-nyň köpçülikleýin premýerasy 9-njy ýanwarda Brýusseldäki awtosalonda bolar. Şondan soň Ýewropada satylyp başlanar. Model Volkswagen Golf, Peugeot 308, Toyota Corolla we Hyundai i30 bilen bäsleşer.
