Stellantis konserni Opel Grandland krossoweriniň täze nusgasyny tanyşdyrdy. Ol pyýadalar we ýol hereketine gatnaşýan beýleki adamlar bilen ýagtylyk arkaly aragatnaşyk saklap bilýär.
Ulag üçünji derejeli «awtopilot» ulgamy, kameralar we ýagdaýy seljerip, ýol hereketindäki «meýilleri çaklaýan» emeli aň bilen enjamlaşdyryldy. Ýagdaýa görä ýagtylyk elementleriniň reňki üýtgeýär: awtonom hereketde bolanda öwrüliş görkeziji çyralary gök reňkde ýanýar, pyýada ýüze çykanda we ulag haýallap başlanda bolsa faralaryň ak reňki çal reňke öwrülýär.
Ulagyň öň tarapynda adaty ýagdaýda logotip ýerleşýän ýerde kiçi ekran bar. Onda aýratyn nyşanlar görkezilýär: meselem, gyzyl öwüşginli «!», pyýadanyň «dur» nyşany ýa-da ýaşyl adamça nyşany «geçmäge rugsat» alamatyny berýär.
Stellantis kompaniýasy ýörite saýlanylan reňkleriň adaty ulag signal reňkleri bilen gabat gelmeýändigini belledi. Taslama Darmştadtdaky Tehniki uniwersitet bilen hyzmatdaşlykda döredildi. Bu tehnologiýanyň awtonom dolandyryşly tapgyrlaýyn ulaglarda peýdalanyljakdygy barada bolsa entek takyk maglumat berilmedi.
