Hermès noutbugyň kamerasyna ýelmemek üçin deri plastyrlaryny satuwa çykardy. Täze önüm brendiň resmi saýtynda peýda boldy.
Ulanyjylar, adatça, web-kameralary gizlinlik maksady bilen ýapýar. Şeýle usul tötänleýin ýazgy etmek ýa-da kamera rugsatsyz elýeterli bolmak töwekgelçiligini azaltmaga kömek edýär, şonuň üçin köp adamlar wideoaragatnaşykdan peýdalanmaýan wagty ony ýapyp goýmagy makul bilýär.
Hermès-iň toplumyna üç plastyr girýär we onuň bahasy 145 funt sterlinge – tas 195 ABŞ dollaryna barabar. Plastyrlar goýun derisinden taýýarlandy. Her birinde markanyň logotipi we «Fransiýada öndürilen» ýazgysy ýerleşdirildi.
«Suratlary, bellikleri asmak, noutbugyň kamerasyna ýelmemek ýa-da öz goşlaryňyzy tapawutlandyrmak üçin tüýs laýyk gelýär» — diýip, moda öýi belledi.
Bir plastyryň ölçegi — 9,9 x 2,4 santimetr. Öndüriji her bir nusganyň özboluşlydygyny belleýär. Aksessuar dürli reňklerde çykarylýar we toplumyň reňki öňünden belli däl – ulanyjy ony diňe alandan soň bilýär.
Hermès 1837-nji ýylda at esbaplaryny we ekipažlaryny taýýarlamak boýunça ussahana hökmünde döredilen fransuz moda öýüdir. Wagtyň geçmegi bilen brend deri önümlerine, ilkinji nobatda, torbalara ýöriteleşip başlady. Iň belli modelleriň biri aktrisa Jeýn Birkiniň stili boýunça döredilen Hermès Birkin torbasydyr.
