Samsung kompaniýasy One UI 8.5 operasion ulgam örtüginiň beta-wersiýasyny ýaýratmaga girişdi we ol öndürijiniň interfeýs bezegine täze çemeleşmesini görkezýär. 9to5Google portaly dizaýnyň käbir elementleriniň Apple Liquid Glass stilini ýada salýandygyny belleýär.
Täze One UI 8.5-de Liquid Glass-e mahsus bolan doly durulyk bolmasa-da, Samsung birnäçe meňzeş dizaýn çözgütlerini girizipdir. Mysal üçin, ulgam programmalarynda we sazlamalar menýusynda iOS-daky ýaly «Yza» ýüzýän düwmesi peýda boldy.
Mundan başga-da, «Telefon» we «Galereýa» ýaly Samsung programmalarynda nawigasiýa panelleri ýüzýän boldy we aýlawly burçlary aldy. «Kalkulýator» programmasy hem täzelendi, indi onda düwmeler has uly görünýär.
Google-yň ýakynda hödürlenen Material 3 Expressive dizaýn toplumynyň hem oňyn kabul edilendigine garamazdan, Samsung öz esasy bäsdeşinden ylham alan elementleri girizmek kararyna geldi. One UI 8.5 örtügi 2026-njy ýylda, ähtimal, Galaxy S26 flagman hatary tanyşdyrylandan soň, Samsung Galaxy smartfonlarynda ýaýradylyp başlanar diýlip garaşylýar. Häzirki wagtda beta-wersiýa Galaxy S25 hatarynyň smartfonlarynyň eýelerine gurnamak üçin elýeterlidir.
