BMW konserni täze baş direktoryň bellenendigini habar berdi. 2026-njy ýylyň ýazynda bu wezipäni eýeleýän Oliwer Sipseniň ornuna Milan Nedelkowiç geçer.
Kompaniýanyň täze ýolbaşçysynyň asly Serbiýadan we ol 56 ýaşynda. Ol konsernde 1993-nji ýyldan bäri işleýär. 2019-njy ýyldan bäri BMW Group-yň önümçilik bölüminiň ýolbaşçysy wezipesini eýeleýär we müdirler geňeşiniň düzümine girýär.
Kompaniýa Nedelkowiçiň BMW-niň ýolbaşçysynyň wezipe borçlaryna 2026-njy ýylyň 14-nji maýynda girişjekdigini belledi.
Konserniň häzirki ýolbaşçysy Oliwer Sipse BMW-de 35 ýyl işläninden soň işden gider. Ol konserne 2019-njy ýyldan bäri ýolbaşçylyk edýär. BMW-niň synçy geňeşi oňa BMW Group-da gazanan üstünlikleri üçin minnetdarlyk bildirdi.
Ýolbaşçylygyň çalşylmagy BMW-niň satuw barada oňyn hasabat beren döwründe bolup geçýär. 2025-nji ýylyň üçünji çärýeginde konsern bütin dünýäde 588,3 müň ulag satdy, bu bolsa 2024-nji ýylyň degişli döwri bilen deňeşdirilende 8,8% köpdür. Kompaniýa Ýewropa bazarynda islegiň 9,3% we ABŞ-nyň bazarynda 24,9% ösüşini hasaba aldy.
Ýanwar aýyndan sentýabr aýy aralygynda BMW-e girýän ähli brendleriň satuwy 1 795 894 ulag boldy, bu bolsa geçen ýylyň 9 aýyndaky görkezijiden 2,4% köpdür.
Şeýle-de, BMW üçünji çärýekde arassa girdejiniň 256,5% ýokarlanyp, 1,697 mlrd ýewro ýetendigini habar berdi. Şol bir wagtyň özünde, üç çärýegiň jemi boýunça konserniň arassa girdejisi 6,8% azalyp, 5,712 mlrd ýewro boldy.
