ABŞ-da kazyýet Google-y öz gözleg ulgamynyň ýa-da emeli aň hyzmatlarynyň smartfonlarda we beýleki enjamlarda awtomatik ulanylmagy baradaky hyzmatdaşlyk şertnamalarynyň şertlerine her ýyl gaýtadan garamaga borçlandyrdy.
Bu karar bilen kazy Amit Mehta ABŞ-nyň Adalat ministrligi tarapyndan teklip edilen çäklendirmeleri goldady. Çäklendirmeler Google-yň onlaýn gözleg bazarynda monopoliýaçy diýlip ykrar edilmegi bilen baglanyşykly boldy.
Ozal kompaniýa Apple we Samsung ýaly hyzmatdaşlar bilen köpýyllyk şertnama baglaşyp bilýärdi.
Karar Google-y iPhone we Android smartfonlarynda, şol sanda Samsung enjamlarynda esasy gözleg ulgamy bolmak baradaky şertnamany her ýyl gözden geçirmäge borçlandyrýar. Maksat bäsdeşlere, ilkinji nobatda, generatiw EA programmalaryny işläp düzüjilere orun üçin bäsleşmek mümkinçiligini bermekdir.
2024-nji ýylyň awgustynda Waşingtonda bu kazy Google-y web-gözleg bazarynda monopoliýaçy diýip ykrar edipdi. Şeýle-de, ol Adalat ministrliginiň Chrome brauzerini satmaga mejbur etmek baradaky arzasyna-da seretdi, ýöne ony ret etdi. Şol bir wagtyň özünde, Google bäsdeşleri bilen maglumatlary paýlaşmaga borçlandyryldy. Kompaniýa öndürijiler bilen gözleg ulgamy, brauzer we programma dükany bilen bagly aýratyn şertnamalary baglaşmak hukugyny-da ýitirdi.
Google kazyýetiň Apple we Samsung bilen gözleg ulgamy baradaky şertnamanyň ABŞ-nyň monopoliýa garşy kanunyna garşy gelýändigini nygtaýan çözgüdine garşy şikaýat etmek isleýär. Adalat ministrligi hem çözgüdiň bäsdeşligi goramak çäreleri bilen bagly tarapyna garşy şikaýat edip biler.
